Langa Poem I Dae By Chapta Wata Na Dak Ples

to mi, na wan gren poem dae na worl
yu go jes dae rayt am normor tae go
tae ning nang

tem dae i go tae yu nor rayt natin
oda tem
eni minit yu fulop pepa
bikos wetin yay si
en yase yeri
somtem dae kin ful mot
pas yu tek blu bik ondastand am

as dem kin aks
na buk mek sens or na sens mek buk?
du ya tel wi no profesoh

dis layf ya so
yu noh go no wetin dae kam mit yu

tidae olting fitin gbet
tumara
da wata wey na foh yu sef sef
go ron lef yu
biliv
den nah ya so sef
if yu noh pay yutiliti bill
di wata wey na foh yu
i noh go ron at ol

tiday yone, na wan blu dog wan trifut mi
wey ah komot na was ose

he he, yu fil sae na lay eh?
na udat noh get pikin na ose normor go dawt di wod

di dog, dem rayt na im sayd, Taylor Swift

eniwe, a balans di blu Topsy
nah im mek ah ebul tinap front una rayt naw
de wondrin....

usai dae wae man get foh go
wen olting skata na im han'
olting los pan am
im abope
wey im shem noh koba egen

na fiaful ples da wan dey oh
leke Pademba Rod kondoh
wey layt noh dae fo si wetin yu dae put na mot
yu noh sabi wetin yu dae it


(to be continued)

Langa Langa Poem (I Dae By Chapta) Langa Tranga Poem (De Riyal Chapta Wan)

dis na langa langa poem

tranga tranga poem

wey yu si na red ink nomo

fit fo tek rayt am



poem wey man no rili mek op fo rayt sef

na pepa en pen mitop oh

bifo jek

poem bigin rayt insef

naijiria man kin seh

nah wah oh



yu blant si dray yay poem lek dis wan dey

langa poem lek dis

liba poem lek dis

poem wey get maynd fo waka bia fut pan chuk chuk

get maynd fo rayd baysikul bia wes

na kwari



basta pikin poem

to mi enitin wey ah dae fen nah dis wol, leh ah noh get am

sweh to mi mami, mi na man is dis

leh ah alaki kayn poem



Nah dem poem ya kin luk yu na yu yay

koro koro wan

den laf to yu

don i chap yu 'an fep

bifo do klin sef



wen i don i go sidom

konvinient wan wit im padi dem

dae it atcheke



langa tranga basta poem

wey if yu luk am gud

na Afrikaman poem

bot i fiba lek i fambul to da poem

wey muta bin rayt nah jimeka

wey nem dis poem



bot normor

ah biliv mi pej lekke ow a biliv

mi wef

en mi pej tel mi sey na mi bon dis poem

en olman sey di poem fiba mi

wit im langa tranga basta sef



noh men am oh

sontem dae i kin mek lek oodat

noh dae tok

lekke bota noba melt

na im mot



ah dae tel yu somtin

if dis poem mek na ya

i kin mek dull eyes ol

melt lek den fom tri pikin

wey na tiday fos

ticha dae yan am



da tem dae yu noh go biliv

sey na da sem raray man poem

wey kin dae kos mami kos

en pull shot fo fet

rob pepe nah yu yay en yu wes jangrey man poem



i kin sidom midul sivilays poem dem

lek fayn fayn flawa

dae mek gud boy

so tae tradey da grani nah big yad

wey im yes kok, en i noh dae si fayn

gi poem koppoh fo go bay patch granat

en sevin op



olman pini

grani sey "nah wetin?"

olman set mot



poem noh du wan in noh du tu

i ton bak ma

wit di granat, di sevin op

en di grani in chenj

i shotop evribodi



yu go olmos wan for sey

usai tru dae foh tok

dis poem ya get trenin

bot if yu luk gud gud

insay in yay

yu go no seh

i noh go ezitet foh kil posin

rigadles if i don tote in faya



langa langa poem

tranga poem wey no givadem, givarap

poem wey get penda na im fut

den drai drai fut

wey wet man noh kin biliv sey get trenk

foh tote motalman sef

bikos den kin luk di fut by di lukin

noh no sey pamine dae gi trenk

i lek sef i noh gi bodi



noh no sey poem nah dem ole bone yong boy

wey don pley bol

tu shilin ren bol

pan motoka trit wey get galop

en klem koknat tik

en dans jiglo na blowop en kawnt en laronda

bifo insef luk ping en lef

wey den ples dae noh swit am egen



Langa tranga poem wey get ekspiriyens

poem wey go kollej

di tem wey kollej nah bin still sontin



(to be continued)